|
Ratu Pastor nupui na taka kuthlak a ni |
 |
 |
 |
|
Written by chda
|
|
Wednesday, 19 November 2008 09:06 |
By Lalnuntawma Fanai, News Editor, Zoram Today
Nizan hmasa dar 11 vel khan Ratu Pastor Rev Lalramliana nupui Pi H Rohlupuii (k-36) chu Richard Darthanpuia k-21 mi chuan an inchhungah luhkhungin bakchehin a vit a, a hrawkah hmun hnihah a vit a, a hmuiah leh a awm hnuaiah vawi 1 ve ve a vit bawk. Tunah hian Aizawl Civil Hospital-ah dahluh nghal a ni a, nimin tlai khan thisen unit 2 pek nghal a ni. Nimin khan Darlawn Police te chuan Richard-a rinhelh thil thu-ah an man nghal a, nimin tlai lam khan Richard-a hi police te hmaah a inpuang nghal a ni.Hetianga police ten an man hnu hian mobile phone a lo lak, a pite bangrela a lo dah chu police te hian an mansak ve leh nghal a ni.
Pu K Lalthlamuana, Pi H Rohlupuii pu hnen atanga kan thudawn danin he thil thlen hun hi nizan hmasa dar 11 vel kha a ni a. Pi Rohlupuii khawihtu Richard-a hian Pastor ina a luh hian inchhunga current wire kal zawng zawng chu a chep chat hmasa vek a. Hemi hnu hian Pi Rohlupuii hi a rek ta a. Hetia a reh hian Pii Rohlupuii hi a tal nasa hle a, Richard-a hian reh hlum a tum ngei nia an ngaih thu an sawi a. Hetianga Pi Rohlupuii’n nasa taka a lo beih ve avang hian Richard-a hian bakcheh hian a vit ta a ni. Nimin tlaiah hian Pi Rohlupuii hi a tawng peih tan tawh a, amaherawhchu a hliam tawrhna chi hrang hrang avang hian tawng harsa a ti hle a. Pi Rohlupuii hian a thawk zawngin na a tih thu a sawi a. Thudawnna chuan a awm hnuaiah bakcheh lut hian a chuap a khawih thleng niin an sawi bawk. Hetianga Richarda’n kut a thlak chhan chungchanga zawhna chhangin Pu K Lalthlanmuana chuan Richard-a nen hian inhuatna an neih awm reng reng an hriat loh thu leh a sum duh vang leh sual vang hrim hrima kutthlak a nih an rin thu a sawi bawk. He pawikhawihtu Richard-a hi tunhma lama Ratu khuaa lo awm thin a ni a, tunah hian Chaltlanga Lily Vengah an khawsa mek a. Pathianni a Ratu khua Aizawl Civil Hospital a boral chu a zui chho chu a cham tlang ta a ni. He thil thlen zan hian Pi H Rohlupuii hi an nau Parzeli’n a riahpui a, Parzeli hi a hmaa mitthi avang hian a lo meng rei deuh a, a chauh deuh avangin an thawm pawh hi a hre mai niin an chhungte chuan an sawi bawk. Thudawnnain a sawi dan chuan Pi H Rohlupuii Ratu Primary school zirtirtu a ni a, hetianga tawhsual a tawh hma lawk hian a Arreal a la a, he pawisa hi Richard-a hian laksak a tum nia an ngaih thu an sawi bawk. He thil thlen lai hian Pi Rohlupuii pasal Rev Lalramliana hi Synod finance committee nei turin Aizawlah a lo kal lai tak a ni a, an fate 2 hi Hostelah an awm bawk a ni.
Nimin khan he thil thleng avang hian Aizawl khawpuia ti ti lengvak a awm nghal a, a psal Rev Lalramliana hi Ratu khuaa MPF chairman anih avangin a nupui hi kut thlak a nih rin thu a thang nghal a. Hemi chungchangah hian vanduaina tawktu chhungte chuan hetianga thu thang leng vel chu an rin loh thu leh amah kutthlaktu hi a sual vang hrim hrim leh pawisa a duh vanga nia an rinthu an sawi a ni. Nimin khan MPF General Secreatary Upa Lalramthanga leh Pastor thenkhatte chuan Damdawiinah hian an tlawh ve nghal bawk a ni.
 |
Subscribe to this comment's feed
